打機樂

曾幾何時, 我記得我都好鍾意打機....Princess Maker, SimCity, 夢幻西餐廳...一玩o個D育成, 模擬, RPG就唔停得手, 書唔讀, 街唔出, 電視唔睇, 瞓醒就玩, 玩到頂唔順就瞓, 爆左再玩, 俾媽子鬧過無數次. 後來為左要考試, 就"的"起心肝, 一刀切, 唔再掂部腦, 唔再去睇多半眼有咩game, 最後戒甩左.

到左大學, 偶然知道已經出左好多好玩既game, 但我自知自控能力低, 唯有又完全唔接觸任何game, 行過旺電, 黃金, 一定唔會行入game舖. 咁我又好安全同專心咁過左我既大學生涯.

點知舊年, 個死肥仔抽起我條筋, 無啦啦話買部NDSL, 咁就出事喇!

初初都仲OK, 我鍾意既game唔係太多, 又有好多係日文game, 每次打爆, 都曉停一停, 再揀清楚好玩既先慢慢玩.

早排, 身痕試左D日文game, 又覺得理解到喎! 之前唔玩係因為我覺得唔知隻game講乜, 會唔好玩, 但試過又掂喎, 睇圖睇漢字, 都get到...(真係覺得game商好魔鬼, 明明D玩家唔識o個隻language, 都可以做埋佢生意...). 咁我又試下D好想玩既日文game...咁就...

就係呢隻<心跳回憶>, 我又中毒喇!!!

過左o個兩個禮拜, 逢星期五六, 我都玩通霄; 平日, 都玩到瞓得兩三個鐘.

(試過唔記得左餵二貓....)

點好玩? 我唔講喇, 反正我講千零二千字都唔會有人同情我...總知男主角好OK, 玩親好想快D知結局得唔得, 同埋男主角仲好鍾意貓添...

而家, 部機俾肥仔沒收左同我戒毒, 因為其實我呢幾日要讀書, 但係未讀過. 佢沒收我部機, 無得玩, 我就通霄上網揾攻略, 佢就黎俾我激死.

頭先我仲同肥仔講我諗住買部Play Station, 因為有心跳2, 佢即刻想嘔血.

我今次死喇...